رامازان ئايلىرىدا ۋاپات بولغانلار جەننەتكە كىرەمدۇ؟

سوئال: ئەسسالامۇئەلەيكۇم، ئۇستاز! بىر كىشىنىڭ: «رامازان ئايلىرىدا ۋاپات بولغان كىشى جەننەتكە كىرىدۇ» دېگەن ھەدىسنى ئوقۇغانمەن، دېگىنىنى ئاڭلىغانتىم. شۇنداق ھەدىس بارمۇ؟ ئۇنداقتا، ناماز ئوقۇمايدىغان، روزىمۇ تۇتمايدىغانلارمۇ مۇشۇنداق خاسىيەتلىك ئايلاردا ۋاپات بولسا جەننەتكە كىرەمدۇ؟

جاۋاب: ۋەئەلەيكۇم ئەسسالام ۋەرەھمەتۇللاھى ۋەبەرەكاتۇھۇ.

بارلىق ھەمدۇسانا جانابى ئاللاھقا بولسۇن، شۇنداقلا پەيغەمبىرىمىزگە، ئائىلە – تاۋابىئاتلىرىغا ۋە ئۇنىڭغا تاكى قىيامەتكىچە ئەگەشكەنلەرگە دۇرۇت – سالاملار بولسۇن.

رامازان ئېيىدا ۋاپات بولغان كىشىگە ئالاھىدە مەرھەمەت ياكى مەغپىرەت قىلىنىپ جەننەتكە كىرىدىغانلىقى ھەققىدە سەھىھ ھەدىس يوق. لېكىن، ئاخىرقى ئەمىلى ياخشى ئەمەل – ئىبادەت بىلەن ئاخىرلاشقان، تائەت – ئىبادەت قىلىۋاتقان ھالەتتە ۋاپات بولغان كىشى ھەققىدە ھەدىسلەر كەلگەن.

زەيد ئىبنى ۋەھب رىۋايەت قىلىدۇكى، ئابدۇللاھ ئىبنى مەسئۇد رەزىيەللاھۇ ئەنھۇ مۇنداق دېگەن: راست سۆزلىگۈچى ھەم راست سۆز يەتكۈزۈلگۈچى زات بولغان رەسۇلۇللاھ سەللەللاھۇ ئەلەيھى ۋەسەللەم بىزگە مۇنداق سۆزلەپ بەرگەن: «ھەربىرىڭلار ئانىسىنىڭ بالىياتقۇسىدا قىرىق كۈن جەملىنىدۇ. ئاندىن يەنە شۇنچىلىك كۈندە ئۇيۇل قان بولىدۇ. ئاندىن يەنە شۇنچىلىك كۈندە بىر چىشلەم گۆش بولىدۇ. ئاندىن ئاللاھ بىر پەرىشتىنى ئەۋەتىپ، مۇنۇ تۆت نەرسىنى پۈتۈشكە بۇيرۇيدۇ: ئۇنىڭ ئەمىلى، رىزقى، ئەجىلى ۋە بەختلىك ياكى بەختسىزلىكى. ئاندىن ئۇنىڭغا روھ پۈۋلىنىدۇ. شۇڭا، سىلەردىن بىر كىشى ئەھلى جەننەتنىڭ ئەمىلىنى قىلىپ جەننەتكە كىرىشكە پەقەت بىر گەزلا قالغاندا، ئەينى چاغدا پۈتكەن پۈتۈك غالىب كېلىپ، ئەھلى دوزاخنىڭ ئەمىلىنى قىلىپ دوزاخقا كىرىدۇ. بىر كىشى ئەھلى دوزاخنىڭ ئەمىلىنى قىلىپ كېلىۋېتىپ، دوزاخقا كىرىشكە پەقەت بىر گەزلا قالغاندا، ئەينى چاغدا پۈتكەن پۈتۈك غالىب كېلىپ، ئەھلى جەننەتنىڭ ئەمىلىنى قىلىپ جەننەتكە كىرىدۇ».(1)

يەنە بىر ھەدىستە مۇنداق كەلگەن: «كىمكى ئاللاھنىڭ رازىلىقىنى كۆزلەپ: ‹بىر ئاللاھتىن باشقا ھەق مەبۇد يوق› دەپ، ئاشۇ سۆزى بىلەن ھاياتىنى ئاخىرلاشتۇرسا، جەننەتكە كىرىدۇ. كىمكى ئاللاھنىڭ رازىلىقىنى كۆزلەپ بىر كۈن روزا تۇتۇپ، ئاشۇ روزىسى بىلەن ھاياتىنى ئاخىرلاشتۇرسا، جەننەتكە كىرىدۇ. كىمكى ئاللاھنىڭ رازىلىقىنى كۆزلەپ بىر سەدىقە بېرىپ، ئاشۇ سەدىقىسى بىلەن ھاياتىنى ئاخىرلاشتۇرسا، جەننەتكە كىرىدۇ».(2)

دېمەك، بۇ ھەدىسلەر روزا تۇتقان ھالىتىدە دۇنيادىن كېتىشنىڭ، يەنى، دۇنيادىكى ئەمەللىرى تائەت – ئىبادەت بىلەن ئاياغلاشقاننىڭ پەزىلىتىنى كۆرسىتىدۇ.

ئەبۇ ھۇرەيرە رەزىيەللاھۇ ئەنھۇ رىۋايەت قىلىدۇكى، رەسۇلۇللاھ سەللەللاھۇ ئەلەيھى ۋەسەللەم مۇنداق دېگەن: «رامازان ئېيى كىرسە، ئاسماننىڭ ئىشىكلىرى ئېچىلىپ جەھەننەمنىڭ ئىشىكلىرى تاقىلىدۇ، شەيتانلار باغلىنىدۇ».(3)

يەنە بىر رىۋايەتتە: ئەبۇ ھۇرەيرە رەزىيەللاھۇ ئەنھۇ رىۋايەت قىلىدۇكى، رەسۇلۇللاھ سەللەللاھۇ ئەلەيھى ۋەسەللەم مۇنداق دېگەن: «رامازان كەلسە، جەننەتنىڭ ئىشىكلىرى ئېچىلىدۇ».(4) «سەھىھۇ مۇسلىم»نىڭ يەنە بىر رىۋايىتىدە: «رەھمەتنىڭ ئىشىكلىرى» دەپ كەلگەن.

بۇ سەھىھ ھەدىسلەردىن ئاسماننىڭ، جەننەتنىڭ ۋە رەھمەتنىڭ ئىشىكلىرىنىڭ رامازان ئېيىدا ۋاپات بولغان ياكى ياخشى ئەمەللەرنى قىلغان كىشىلەر ئۈچۈن ئېچىلىدىغانلىقى، رامازان ئېيىدا مەغپىرەت، ئەپۇ قىلىش كۆپ بولىدىغانلىقى كۆرۈنۈپ تۇرىدۇ.

بۇنىڭغا ئاساسەن، روزا تۇتۇپ، ياخشى ئەمەللەرنى قىلىپ رامازاندا تۈگەپ كەتكەنلەرگە قارىتا خۇش پال ئالسا بولىدۇ. ئۇنىڭ ئۈستىگە، رامازان ئېيى مەغپىرەت ئېيى بولغاچقا، روزا تۇتقان، تائەت – ئىبادەتلەرنى قىلغان مۇسۇلماننىڭ رامازان ئېيىدا جانابى ئاللاھنىڭ پەزلى – مەرھەمىتىگە نائىل بولۇشى ئۈمىد قىلىنىدۇ.

ۋەللاھۇ ئەئلەم.

دوكتور ئابدۇلئەزىز رەھمەتۇللاھ

2011. 8. 10

«پەتۋالار مەجمۇئەسى»، 2 – توم، 20 – نومۇرلۇق پەتۋا.

—————————————————

1. سەھىھەين: «بۇخارى»، 3208 – ھەدىس؛ «مۇسلىم»، 2643 – ھەدىس.
2. «مسند أحمد»، 23372 – ھەدىس. ئالبانى: «سەھىھ» دېگەن. «صحيح الترغيب والترهيب»، 1/985.
3. «بۇخارى»، 1899 – ھەدىس.
4. سەھىھەين: «بۇخارى»، 1898 – ھەدىس؛ «مۇسلىم»، 1079 – ھەدىس.

Please follow and like us:

جاۋاب يېزىش

ئېلېكتىرونلۇق خەت ئادرېسىڭىز ئاشكارىلانمايدۇ. * بەلگىسى بارلارنى چوقۇم تولدۇرۇسىز