تولۇق كىيىنمەي ئولتۇرۇپ قۇرئان ئاڭلاش ھەققىدە

سوئال: ئەسسالامۇئەلەيكۇم ئۇستاز! ئاياللار ئۆيىدە تولۇق كىيىنمەي قىرائەت ئاڭلىغاچ ئۆي ئىشلىرى بىلەن مەشغۇل بولسا بولامدۇ ياكى گۇناھكار بولامدۇق. مەلۇمات بەرسىڭىز. ئاللاھ رازى بولسۇن.

جاۋاب: ۋەئەلەيكۇم ئەسسالام ۋەرەھمەتۇللاھى ۋەبەرەكاتۇھۇ.

بارلىق ھەمدۇسانا جانابى ئاللاھقا بولسۇن، شۇنداقلا پەيغەمبىرىمىزگە، ئائىلە – تاۋابىئاتلىرىغا ۋە ئۇنىڭغا تاكى قىيامەتكىچە ئەگەشكەنلەرگە دۇرۇت – سالاملار بولسۇن.

تولۇق كىيىنىش قۇرئان ئوقۇشقا شەرت بولمىغاچقا، ئاياللار يالاڭباش ياكى پۇت – قوللىرى ئوچۇق ئۆي ئىچىدە كىيىدىغان كىيىملىرىدە، ئۇخلاش كىيىملىرىدە ياكى زىبۇ – زىننەت بىلەن ياسانغان ھالەتتە قۇرئان كەرىم ئوقۇسا، ئاڭلىسا بولىدۇ. ناماز ئوقۇماقچى بولسا، يات ئەرلەر كۆرىدىغان جايدا بولسا قۇرئان ئوقۇسۇن ياكى ئاڭلىسۇن ياكى ئاڭلىمىسۇن ئەۋرەتلىرىنى، ئىچكى زىبۇ – زىننەتلىرىنى يۆگىشى لازىم.

يەنە ئەر بولسۇن ئايال بولسۇن قۇرئان ئوقۇش ياكى ئاڭلاش ئولتۇرغان ھالەتتىمۇ ياتقان ھالەتتىمۇ جائىز، ئۇنىڭ ئۈچۈن يۈكۈنۈپ ئولتۇرۇش ياكى قىبلىگە يۈزلىنىش كەتمەيدۇ، ئاللاھ تائالا ھەرقانداق ھالىتىدە ئاللاھنى زىكىر قىلىپ تۇرىدىغانلارنى مۇنداق دەپ مەدھىيەلىگەن:

[ئۆرە تۇرغاندىمۇ، ئولتۇرغاندىمۇ، يېنى ياتقاندىمۇ ئاللاھنى ئەسلەپ تۇرىدىغانلار، ئاسمانلارنىڭ ۋە زېمىننىڭ يارىتىلىشى توغرىسىدا پىكىر يۈرگۈزىدىغانلار].(1)

ئائىشە رەزىيەللاھۇ ئەنھا رىۋايەت قىلىپ مۇنداق دەيدۇ: «مەن ھەيزدار ۋاقتىمدا رەسۇلۇللاھ سەللەللاھۇ ئەلەيھى ۋەسەللەم مېنىڭ قۇچىقىمغا بېشىنى قۇياتتى، ئاندىن قۇرئان ئوقۇيتتى».(2)

يەنە ئائىشە زەزىياللاھۇ ئەنھا: «رەسۇلۇللاھ سەللەللاھۇ ئەلەيھى ۋەسەللەم ھەرقانداق ھالىتىدە ئاللاھنى زىكىر قىلىپ تۇراتتى، دېگەن».(3)

قۇرئان كەرىم ئوقۇش ئۈچۈن تۈرلۈك شەرتلەرنى بېكىتىۋالغان تەقدىردە، قۇرئان ئوقۇش پۇرسىتىمىزنى ئازايتىۋېتىمىز، قۇرئان يادلاۋاتقانلارغا قىيىنلاشتۇرۇپ قويىمىز. قىيىنچىلىق بولمىغان ئەھۋالدا تولۇق كىيىنىپ، دىققىتىنى يىغىپ خۇشۇ بىلەن ئولتۇرۇپ ئوقۇش ۋە ئاڭلاش ئەدەپ جەھەتتىن تېخىمۇ ئەۋزەل دېيىلسىمۇ پەرز ياكى شەرت ئەمەس.

ئاللاھ ھەممىمىزدىن رازى بولسۇن!

ۋەللاھۇ ئەئلەم.

دوكتور ئابدۇلئەزىز رەھمەتۇللاھ

2011 – 6 – 22

——————————-
1. «ئال ئىمران» سۈرىسى، 191 – ئايەت.
2. سەھىھەين: «بۇخارى»، 297 – ھەدىس؛ «مۇسلىم»، 301 – ھەدىس.
3. سەھىھەين: بۇخارى مۇئەللەق رىۋايەت قىلغان. «مۇسلىم»، 373 – ھەدىس.

Please follow and like us:

جاۋاب يېزىش

ئېلېكتىرونلۇق خەت ئادرېسىڭىز ئاشكارىلانمايدۇ. * بەلگىسى بارلارنى چوقۇم تولدۇرۇسىز